shababmenouf
بسم الله الرحمن الرحيم
"ما يلفظ من قول الا لديه رقيب عتيد"


مرحبا بكم فى موقع ومنتديات شباب هندسة منوف

من يواجه اى مشكلة أو لديه طلب أو اى استفسار
برجاء مراسلتنا على البريد الالكترونى
shababmenouf@yahoo.com

ندعوا الله بأن ينال عملنا إعجابكم ورضاكم

لاتنسونا من صالح دعائكم
اخوكم في الله وليد نمرة

shababmenouf


 
الرئيسيةالبوابةالتسجيلدخول

شاطر | 
 

 كل اللى هتحتاجه فاعدادى....هااااااااااااااااااام ومفيد جدا والله

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
Ahmad showman

avatar

عدد الرسائل : 81
تاريخ التسجيل : 18/09/2009

مُساهمةموضوع: كل اللى هتحتاجه فاعدادى....هااااااااااااااااااام ومفيد جدا والله   الأربعاء سبتمبر 30, 2009 7:24 am


السلام عليكم ورحمة الله
اخيرا يا شباب لقيت موضوع فهمنى كل حاجة عن اعدادى
يسعدنى انه اقدمهولكم بس اقرئوه بتركيز وربنا يوفقنا جميعا
المواد اللي هاتدرسها في الترم الاول:-

الكيمياء:- المادة سهلة جدا باذن الله وهاتلاقي نفسك عارف جزء منها سواءا من دراستك في كيمياء تانية ثانوي او فيزياء تالتة ثانوي ..الكورس بالانجليزي يعني كتاب المادة بالانجليزي وكذلك الشيت والامتحان ايضا هايجيلك بالانجليزي
بس حضرتك تقدر تحل بالعربي ..الكورس عندك غالبا هايبقى 10 فصول الاولانية في الكتاب من اصل 14 فصل الا لو ربنا كرمكو والدكاترة قدرت تخلص معاكو كمان كام فصل زيادة ..ودي فيها امتحان عملي في المعمل قبل امتحانات الترم الاول ياسبوع تقريبا..

اللغة الفنية الاجنبية:- سهلة جدا جدا برضه وتعتبر من مواد التقدير يعني المواد اللي تجيب فيها تقدير وانت مستريح
لانها بتعتمد على جزء بسيط من الجرامر اللي انت اخدته في ثانوي مع مصطلحات هندسية لادوات واشياء هندسية
وغالبا الدكتور بتاع المادة بيقولكو على حاجات معينة في الكتاب في اثناء المحاضرات وخصوصا المحاضرة الاخيرة
هي دي اللي بيجي منها الامتحان ..في اخر الكتاب في شيت بتحلوه وبعدين تقطعوه وتسلموه للمعيد بتاع السكشن بتاعكو او بتسلموه في مركز اللغة اللي جنب المحافظة..هم هايبقو يقولو ساعتها تعملو ايه..

التاريخ الهندسي والتكنولوجيا:- مادة لذيذة جدا ..مابتضافش للمجموع ..يعني حضرتك محتاج تنجح فيها بس مش لازم تقدير يعني ..خصوصا انها مادة من مواد الادبية ..والكتاب كبير جدا ..في الامتحان بيجي 5 اسئلة بتختار منهم اربعة وتحلهم سؤال على كل قسم من دول (مدنية -كهربية- صناعية- ميكانيكية -معمارية) فانت بتختار اربع اقسام من دول وتقرا اكبر قدر منهم في الكتاب عشان تقدر تكتب في الامتحان فيهم ..معلومة لوجه الله غالبا القسم اللي بيخرج من الحسابات هو قسم الهندسة المدنية لانه كبير جدا في الكتاب واسئلته بتبقى مركزة وعشان تحل فيها لازم تحضر محاضرات الدكتور طلعت عويس لانه بيجيب اسئلة هو كان قالها في المحاضرة ومش موجودة في الكتاب ..

التلات مواد دول هاتمتحنهم مرتين مرة في الميد ترم الاولاني ومرة في الترم الاولاني بعد كده تخلصهم وتخلص منهم

يعني امتحانات الترم الاول هاتبقى في التلاتة دول وبس عشان كده ده يعتبر اسهل ترم في هندسة ..

هانتكلم دلوقتي عن المراحل بتاعت الترم الاول :-

هما مرحلتين

مرحلة ما قبل الميد ترم :-

ودي اللي احنا فيها دلوقتي ولغاية ماتمتحنو الميد ترم واللي هايبقى غالبا بعد العيد باسبوعين

ايه هو بقى الميد ترم؟

الميد ترم ده امتحان اعمال السنة زي امتحانات الشهور كده اللي كنتو بتاخدوها في اعدادي بس الفرق انه بيحصل مرة واحدة في الترم مش كل شهر زي ماتقولو كده هو امتحان نص الترم .. ولازم تحل فيه كويس لو عايز تجيب تقدير
لان كل مادة بتتقسم 60 % على امتحان اخر السنة و40 % على اعمال السنة اللي هي (الميد ترم و الحضور في السكاشن والشيتات وامتحانات العملي )

الميد ترم الاول ايه المواد اللي هاتمتحنها فيه:-

اولا مدة كل الامتحانات هاتبقى ساعة وربع باذن الله ده الوقت المحدد للامتحان

هاتمتحن في الميد ترم الاول ( ميكانيكا-فيزياء- رسم هندسي واسقاط -رياضيات- كيمياء- لغة فنية اجنبية)

الامتحان في كل مادة من دول هايجيلك لغاية ماخدت قبل الميد ترم زي ماقولنا ودكتور كل مادة هايقولك الامتحان لغاية فين في المحاضرة اللي قبل الامتحان ..

الميد ترم هايبقى ليه اسبوع خاص بيه للامتحانات وبس يعني هايبقى الامتحان 9 يخلص 10 وربع او 10 ونص وبعد كده على بيتك مافيش سكاشن ولا محاضرات في اسبوع الامتحانات ده..

نتكلم بقى عن الاربع مواد اللي هاتمتحن فيهم ميد ترم اول وميد ترم تاني واخر السنة اللي هايبقو مكملين معاك طول السنة يعني وهاتمتحنهم في الاخر على بعضهم وهم:-

الاربع مواد دول اكبر المواد في الدرجات لانك عندك فيهم امتحانين اعمال سنة واحد في الترم الاول وواحد في التاني
وامتحان في اخر السنة في شهر 6 باذن الله

الميكانيكا:- بتاخدو في الترم الاول استاتيكا وفي الترم التاني ديناميكا وبتمتحنو في امتحان اخر السنة الفرعين على بعض يعني بيبقى الامتحان جزء خاص بالاستاتيكا وجزء خاص بالديناميكا طبعا بيبقى بالانجليزي وبتحل بالانجليزي لانه
كله مسائل واظن انت واخد على حل المسائل بالانجليزي في فيزياء تالتة ثانوي ..طبعا لازم تذاكر المادة دي من اول السنة وتحل مسائل الشيت اول باول اللي المعيدين بيحلو جزء منها في السكاشن ..وانت بتكمل الباقي مع نفسك في البيت عشان لو ماعرفتش حاجة اهه المعيد موجود تسئله انما لو اجلت ياعمونا لاخر السنة مش هتلاقي حد تسئله فنصيحة خلص اول باول ..عشان تبقى مرتاح طول السنة ..
في ميزة بتتيحها دكتورة منى مباشر ان الحاجات اللي بتمتحن فيها في الميد ترم مابتمتحنش فيها اخر السنة يعني
انت خدت مثلا اربع فصول استاتيكا قبل الميد ترم وامتحنت فيهم يبقى كده خلاص خلصت منهم ومسائلهم مش هاتجيلك في امتحان اخر السنة وكذلك في الميد ترم التاني 5 فصول من الديناميكا بترتاح منهم يعني انت تقريبا بتدخل الفاينال ب9 فصول من اصل 18 ..

وعشان ماتقولش اني نصبت عليك ال9 فصول اللي بترتاح منهم انت بترتاح من مسائلهم المباشرة
يعني المطاليب في مسائل امتحانات اخر السنة مابتبقاش منهم بس ممكن تستخدم القوانين اللي فيهم عشان توجد المطلوب اللي عندك في الامتحان ..
الفيزياء:- برضه مكملة معاك على الترمين بتاخد في الترم الاولاني 9فصول وزيهم في الترم التاني بس الدكتور بيختار عدد معين من الفصول يكون فيه امتحان اخر السنة وده بقى كل دفعة وحظها ..يعني السنة اللي فاتت
احنا اتشال من علينا الترم الاول كله باستثناء الفصل الرابع بتاع الموائع ..انتو بقى على حسب التساهيل ..
الامتحان بيجي بالانجليزي طبعا وبيفرق عن الميكانيكا في ان الفيزياء فيها نظري مش مسائل بس يعني الامتحان بيبقى فيه نظري ومسائل ..وكل سنة بتختلف في نسبة النظري يعني ساعات بيبقى قليل جدا وساعات بيبقى كتير شوية ..برضه ديه بتختلف من سنة للتانية ..بس الاكيد ان اغلب الامتحان بيبقى مسائل والجانب النظري مهما كان كبير بيبقى اقل من المسائل ..عشان كده برضه لازم تلحق نفسك اول باول وتحل مسائل الشيت بتاع الفيزياء زي ماقولنا في الميكانيكا بالظبط ..

في حاجات مشتركة بين الفيزياء والميكانيكا:-

الاتنين فيهم smart class room ايه دي بقى؟

ده معمل موجود في الدور الخامس في علوم اساسية ..بيتحط عليه كل فترة كويزات او اسئلة للطلاب على موقع
بتدخل انت تمتحن سواءا من اي مكان فيه نت او تمتحن من المعمل نفسه ..وليك يوزر وباسورد بيوزعوه عليكم بعد اسبوعين تقريبا بتدخل على الموقع بيهم عشان تقدر تمتحن ..

الدرجات اللي انت بتجيبها في الكويزات دي بتتجمع في اخر السنة وتنضاف لدرجة اعمال السنة .. في غير كده حاجة تانية

قبل امتحانات كل ترم باسبوع تقريبا هايبقى في امتحانات عملي..في الترم الاول العملي هايبقى على ايه؟

الكيمياء :- ودي هاتجيب بالطو ابيض وتمتحن العملي في هنجر الكيمياء وغالبا هايبقى الامتحان في الكشف عن الشق الحامضي والقاعدي ..

الفيزياء :- هاتسلم الشيت محلولة فيه التجارب اللي انت خدتها في الترم الاول بالرسم البياني بتاعها ولازم قبل ده تكون التجارب دي متصححة وممضية من المعيد بتاع السكشن بتاعك

هاتدخل تمتحن عملي في المعمل يعني هاتعمل تجربة بايدك وتطلع النتايج وتكتبها وطبعا هاتكتب خطوات التجربة وترسم الرسم البياني لو فيه على حسب النتايج اللي طلعت معاك

بعد كده هاتمتحن في الsmart امتحان على الكمبيوتر هايبقى فيه 5 اسئلة اختيارات وعليه 10 درجات وهاتعرف نتيجتك في الامتحان ده قبل ماتمشي لان الكمبيوتر بيحسبلك النتيجة وبيقولك الاسئلة اللي حلتها غلط

الميكانيكا:- ودي بتمتحن فيها في ال smart بس برضه امتحان على الكمبيوتر فيه 5 اسئلة وعليه 20 درجة منهم تقريبا 11 على تجربة ..بس التجارب دي بتبقى موجودة على شرائح بور بوينت على الجهاز انت شغلتك انك تعرف السؤال ده على انهه تجربة وتحط القيم اللي عندك هايطلعلك هو النتيجة من غير اي تعب ..وقبل امتحانات العملي هايدخلوكو المعيدين ال smart ويشرحولكو التجارب دي وازاي تتعاملو مع كل واحدة فيهم ..

دي كل امتحانات العملي اللي هاتمتحنها في الترم الاول
الرياضيات :- بتاخد في الترم الاول جبر وتفاضل وفي التاني تكامل وهندسة تحليلية والحل الوحيد عشان تعرف تحل في امتحان اخر السنة انك تحل مسائل الشيت او اكبر قدر منها ..يعتبر اصعب الفروع فيها هو التكامل انما الفرعين
بتوع الترم الاول اللي هم التفاضل والجبر مافيهمش اي مشكلة ..وزي ماقولنا انت لو حليت كتير هاتجيب تقدير في المادة دي..

الرسم الهندسي والاسقاط:- في الترم الاول هاتمتحن فيهم ميد ترم ..وفي ك سكشن رسم هاترسم لوحة في السكشن وهتاخد رسمة واجب ترسمها وتجيبها السكشن اللي بعده ولازم تخلصهم في مواعيدهم عشان ماتتزنقش اخر الترم لانك بتسلم اللوح كلها الواجب والسكشن والمعيد بيديلك عليهم درجة اعمال السنة بتاعت الترم الاولاني ..يعني ماتؤجلش في الرسم بالذات من ناحية عشان ايدك تتعود عليه وتبقى سريع فيه ومن ناحية عشان ماتؤخرش لوح وتتزنق ..بالنسبة للاسقاط انت بتستلم شيت مع الكتاب بتسلمه اخر الترم الاول وبيتحط عليه اعمال السنة برضه .. والشيت ده المعيدبن بيحلوه معاك في السكاشن عشان كده لازم تحضر سكاشن الاسقاط ويكون معاك الشيت وترسم بايدك في السكشن ..لان المادة صعبة جدا تفهمها لوحدك ولو اكتفيت انك في السكشن تسمع وبس مسافة ماتخرج من السكشن هتلاقيك نسيت كل حاجة ..

وتقسيم السكاشن بيبقى سكشنين رسم وسكشن اسقاط ..ودرجة امتحان اخر السنة بتبقى الدرجة الاكبر للرسم
بس لازم تنجح في الورقتين ..يعني لو مش حالل حاجة في الاسقاط هاتشيل المادة على بعضها للاسف[Link nur für registrierte Benutzer sichtbar]

وكده يكون اتكلمنا عن كل المواد اللي هاتدرسها في الترم الاول وازاي هاتتصرف معاها

بعد ماعرفناك على كل المواد اللي هاتمر عليك في الترم الاول

نيجي للمرحلتين بتوعه وانا هاقسمها زي ماقسمتها قبل كده
بقبل الميد ترم وبعد الميد ترم

قبل الميد ترم:- انت هتتعامل مع كل المواد وهتذاكرها كلها بايدك وسنانك وتحل شيتات الرياضيات والفيزياء والميكانيكا حتى لو ماحدش طلب منك حلها في السكشن..انت هاتحلها لان كل مسائل الامتحانات سواءا ميد ترم او فاينال بتبقى من الشيتات دي ياما هي المسائل بالظبط ياما نفس الافكار ..فاللي عايز يجيب تقدير في المواد دي كل اللي عليه يعمله يحل شيتاتها ..

بعد الميد ترم :- هاتكمل برضه بنفس النظام وتذاكر كله بس ممكن تخف شوية من المواد دي وتؤجل حاجات فيها لاجازة نص السنة على اساس تركز في التلات مواد اللي هاتمتحنهم في الترم الاول الكيمياء واللغة والتاريخ..وماحدش يقولي هو انا هذاكر في اجازة نص السنة كمان ياعمونا انت اجازتك هاتبقى شهر تقريبا تبرطع فيه
اهه بدل الملل لو اجلت حاجة لسه ماخلصتهاش تبقى تخلصها فقي الشهر ده ..
....ايه الامكانيات اللي بتيحها الكلية وممكن تخليني اجيب تقدير:-

1- المحاضرة:- بيلقيها عليك الدكتور في المدرج..هاكون صريح معاك وهاقولك انك مابتخرجش فاهم بنسبة 100% في المحاضرة ولا 60% حتى ..ومع ذلك لازم تحضرها ليه بقى ؟؟..حتى لو مافهمتش يابشمهندس ..ركز بس في المحاضرة واكتبها ..هتلاقيك سمعت كام جملة وصلت دماغك كام معلومة من حضورك تروح بيتك تقرا اللي كتبته من المحاضرة يزيد فهمك للموضوع وتحس انك فاهم اكتر ..لما تيجي بقى يتشرحلك الكلام ده في السكشن هايبقى عندك فكرة سمعته قبل كده مش مييح ..تخرج من السكشن وانت فاهم 90% تذاكر في بيتك وتحل تبقى تمام التمااااااااااااااااااام ..

2-السكشن:- ده بقى لازم تحضره ..مش لانه بيتاخد فيه غياب وبس ..ده لانه المصدر الاساسي للفهم بالنسبالك
يعني لو مافهمتش فيه مش هاتفهم خالص..فلازم تحضره وتنقل كل كلمة فيه وتستغل المعيد اسوء استغلال تسئله في اي حاجة مش فاهمها بحيث تطلع منه وانت فاهم اكبر قدر ممكن او حاسس انك فاهم بصفة كبيرة ..
وبعد ماتطلع عين المعيد ممكن لو لسه عندك لبس تستغل زمايلك ..عن تجربة شخصية الحاجة اللي بتتشرحلك من واحد زميلك مابتنسهاش ابداااا..

3- المعامل:- ودي بتاخد فيها سكاشن العملي في الفيزياء والكيمياء بالاضافة لمعمل الsmart اللي بتاخد فيه العملي للميكانيكا والفيزياء ..

4- المكتبة:- مش هاضحك عليكو واقول اننا بنستخدمها بس الاستخدام الوحيد ليها كان في اول السنة في الابحاث اللي كانو بيطلبوها مننا دكاترة التاريخ كنا بنكتب حوالي نص البحث من الكتاب ونشكل الباقي مابين المكتبة والمراجع اللي فيها ومابين النت ..

5-الكتب بتاعت الكلية:- اعتمادك بصفة كبيرة بيبقى على الشيتات بتحلها عشان تعرف مسائلها وبعدين بتسلمها عشان تاخد اعمال السنة انما الكتاب نفسه ..لو عايز تذاكر منه ممكن ..بس مش كتير بيعملو كده لان الكتب بتبقى انجليزي ومفيش وقت للترجمة وخلافه فالاعتماد الاكبر بيبقى على الورق اللي بتشتريه من برة والكلام اللي بتكتبه في المحاضرة والسكشن ده اللي بتذاكر منه ..انما الكتب ممكن تاخدها معاك المحاضرات عشان تساعدك في فهم الدكتور بيقول ايه او ماشي ازاي تعرف تتابعه يعني ..لان الدكاترة بيشرحو من الكتاب بنفس الكلام اللي مكتوب فيه خصوصا لو كان الشرح على البروجيكتور بتبقى شرائح البور بوينت اللي الدكتور بيشرح منها هي هي الموجودة في الكتاب عشان كده ممكن تاخد الكتاب معاك المحاضرة عشان تقدر تتابع كويس مع الدكتور

بس هانتكلم عن الامكانيات المتاحة ليك خارج الكلية :-

الورق :- وده بينزله المعيدين وبيكون نسخة منن الورق اللي المعيد بيشرح منه في السكشن وكل معيد وله اسلوبه في الشرح ..انت بتختار الاسلوب الافضل ليك واللي انت تقدر تفهم منه وده بيختلف من واحد للتاني..بس نصيحة لو المعيد اللي بيديك في السكشن بتفهم منه وبينزل ورق حاول تجيب ورقه عشان ماتتلخبطش لانك اتعودت على اسلوبه ..وطبعا الورق برغم ان الدكاترة مابتعترفش بيه الا انه يعتبر اكتر شيء بتعتمد عليه في المذاكرة خصوصا لو مش ناوي تاخد كورسات بيبقى اعتمادك في المذاكرة على اللي بتكتبه في المحاضرة والسكشن والورق اللي بتشتريه..

اشهر المكتبات للورق :- سنتر البحيري في القومية (فيه اشهر المعيدين في مختلف المواد بشمهندس طارق عبد الفتاح وبشمهندس وليد عبد الفتاح والدكتور المحمدي )
- مكتبة بدوي في شارع السلام (فيها ورق البشمهندس ثروت رياضيات وفيها باقي المواد بس الحقيقة مش عارف اسماء المعيدين بالظبط)
- مكتبة اقرا في شارع السلام برضه (ودي فيها ورق البشمهندس امجد سليمان ميكانيكا وباقي المواد بس برضه مش عارف اسماء المعيدين )
- مركز الفرسان وده عند كوبري علاء الدين اللي قصاد الجامعة عدي الكوبري هاتلاقيه
- وفي مركز العطار عند كلية الطب (بينزل فيه ورق بشمهندس احمد زكي ميكانيكا ومواد تانية برضه مش عارف اسماء المعيدين بالتحديد)

دي تقريبا اشهر الاماكن اللي هاتلاقي فيها ورق حلو ..وتقدر تسئل عن اسم المعيد اللي منزل الورق في المكتبة ..

الكورسات:- ودي برضه بيديها بعض المعيدين اللي بينزلو ورق ..ودي لو مشيت زي ما اتفقنا وواظبت في الكلية مش هتحتاجلها خالص ..يعني الامكانية دي هاتسيبها للاخر ..وماتفكرش فيها الا من بداية الترم التاني لو لاقيت نفسك خلاص مش قادر تمشي لوحدك ومحتاج جدا لكورس ..ممكن تاخد كورسات من اول الترم التاني ..بس نصيحة ماتفكرش في الكورسات من دلوقتي لانها هاتضيع وقتك ولو ماركزتش معاها يعني تاخد الكورس وماتذاكرش حاجة
ساعتها الكورس مش هايفيدك باي حاجة..حاول بس تنتظم من الاول وان شاء الله مش هتحتاج للكورس اطلاقا وزي ماقولنا ماتفكرش في الكورسات الا بعد اجاة نص السنة لو لاقيت نفسك لسه تايه ومش قادر تمشي في مادة معينة



للعلم الموضوع منقول


معلش الموضوع تأخر شويه عليكم
بس الحمد لله انه وصل لينا
لاتنسونى من دعائكم

الرجوع الى أعلى الصفحة اذهب الى الأسفل
walidnamirah
المدير التنفيذي
المدير التنفيذي
avatar

عدد الرسائل : 50
تاريخ التسجيل : 21/09/2007

مُساهمةموضوع: رد: كل اللى هتحتاجه فاعدادى....هااااااااااااااااااام ومفيد جدا والله   الأربعاء سبتمبر 30, 2009 3:25 pm


جزاك الله خيرا يا بشمهندس احمد

فعلا أغلب معلوماتك صحيحة طبعا بس فيه شوية مغلوطة

دا غير ان اسماء الدكاترة اللى كاتبها مش عندنا لان الموضوع منقول

وكمان ده عن الهندسة العادية مش الالكترونية بس هى هى نفس مناهج السنة الاعدادى عندنا

هذا للتوضيح فقط

جزاك الله خيرا وننتظر منك المزيد

اخوكم وليد نمرة
مدير عام المنتدى
الرجوع الى أعلى الصفحة اذهب الى الأسفل
http://www.shababmenouf.co.cc
ahmed2010



عدد الرسائل : 17
تاريخ التسجيل : 15/08/2009

مُساهمةموضوع: رد: كل اللى هتحتاجه فاعدادى....هااااااااااااااااااام ومفيد جدا والله   الأربعاء سبتمبر 30, 2009 6:58 pm

جزاك الله خيرا يا بشمهندس احمد
الرجوع الى أعلى الصفحة اذهب الى الأسفل
أبو باشا



عدد الرسائل : 42
تاريخ التسجيل : 13/06/2009

مُساهمةموضوع: رد: كل اللى هتحتاجه فاعدادى....هااااااااااااااااااام ومفيد جدا والله   الخميس أكتوبر 01, 2009 1:05 am

1000 شكر يابشمهندس علي المعلومات دي scratch
الرجوع الى أعلى الصفحة اذهب الى الأسفل
angle2010

avatar

عدد الرسائل : 69
تاريخ التسجيل : 02/10/2009

مُساهمةموضوع: رد: كل اللى هتحتاجه فاعدادى....هااااااااااااااااااام ومفيد جدا والله   السبت أكتوبر 03, 2009 5:38 pm

شكرا جدااااااااااا
ربنا معانا
باذن الله
الرجوع الى أعلى الصفحة اذهب الى الأسفل
vegeta ssj2



عدد الرسائل : 1
تاريخ التسجيل : 11/11/2009

مُساهمةموضوع: رد: كل اللى هتحتاجه فاعدادى....هااااااااااااااااااام ومفيد جدا والله   الأربعاء نوفمبر 11, 2009 10:32 pm

شكرا لك يا بشمهندس........
الرجوع الى أعلى الصفحة اذهب الى الأسفل
 
كل اللى هتحتاجه فاعدادى....هااااااااااااااااااام ومفيد جدا والله
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
shababmenouf :: منتدى جميع فرق الكليه :: الفرقه الإعدادى-
انتقل الى: