طالب الإعدادي :
- أول شهر:
ياااااااااه اخيرا الحمد لله دخلت كلية هندسة ياسلاااام ما أحلى إن الواحد يحقق الهدف اللي هو عاوزه (ياعيني مايعرفش اللي فيها)
أخيرا هبقى مهندس (مفكر إن الليلة كلها 3 أيام ونص وينام ويصحى ويلاقي نفسه في شركة أربع ادوار)
والحياه هتحلو والليلة هتبقى فل والدنيا ابتسمتلي اخيرا (غلباااااان مايعرفش إنها ابتدت تكشر يلا سيبوه يعيش)
ويمشي في الكلية ويعمل فيها دور المهندس وماشي منفوخ وياسلااااااااام المسطرة ال تى على إيده (مهندس بقى) فاضل شوية ويعلق على صدره بادج ميكا ويكتب تحته مهندس فلان الفلاني
وطالما بقى دخلت هندسة يبقى خلاص كدا ألعب وأفرفش وأتسرمح ما أنا خلاص كدا كدا مهندس ويقضيها بقى خروجات والذي منو
ويعدي الشهر بسلام بلا كوارث
- تاني شهر : الاحساس بالمصيبة , قصدي المسئولية
خلاص بقى خرجنا وانبسطنا وفل الفل كدا نحضر بقى المحاضرات ونشوف ورانا إيه والناس دي بتشتغل إزاي عشان الواحد يحس انه طالب
يبتدي الغلبان يصحى الساعه 5 الصبح عشان يلحق مكان قدام في المدرج الساعه 7 أول ما يجي يلاقي الناس قاعدة قدام تقولشي بايتين في المدرج بقالهم أسبوع يعني تصحى بدري أو متاخر هتتزنق هتتزنق , لا مفر
يلا أهو الواحد يعمل اللي عليه ويحضر .
والباشا يدخل في المعمعة يدخل بالقميص أو التيشرت ساده
يطلع بيه عليه أشكال وألوان إيشي شبشب بكعب وإيشي كوتشي أديداس وإيشي بوما وإيشي رجلين حافية , بيتفح على القميص توكيل باتا
ما علينا بعد الحرب ما تنتهي وكل واحد يشوف هيترزع فين (ده إذا كان فيه مكان يترزع فيه) أو يقف زي اللي عليه دين يبتدي يسمع للدكتور
يستمر عالموضوع ده حوالي شهرين
هب يلاقي نفسو خلاص امتحانات الترم خلاص بتخبط عالأبواب وطبعا البيه زي البطيخه القرعة مش فاهم أي بتنجان ومش عارف هيذاكر إيه وهينيل إيه
ما علينا يدخل الامتحان وياخد اللي فيه النصيب
يدخل عليه الترم التاني
- الترم التاني : (فقدان أمل + بؤس وشقاء = زي ما تيجي تيجي أنا هقطع نفسي)
الأمراض اللي تجيله بعد كل ده:
1- قرفه من الكليه واللي فيها
2 - حالة هيجان وارتيكاريا لما حد يجيبله سيرة المذاكرة
3 - فقدان شهية مزمن للمذاكرة
4- تخيلات غريبة إن الكتاب عبارة عن كلب مسعور لو قربت منه يهوهو
5-يلزق على كرسي الكومبيوتر
6-ترديد جملة (أنا عايز أعرف كنت بذاكر إزاي في الثانوية العامة) وأكيد طبعا مش بيلاقي إجابة
وتيجي الصدمة في الآخر
(كل ده هزار في هزار وما فيهوش حاجة من الواقع ها ها ها)
__________________________________________________ _______________________منقول
